|
Sto’ addiventanno vècchia
e scugnàtella
M’hanno pigliato ‘a pùnie
‘ngoppo ‘o musso.
Cadèno ‘e dènte e ‘a vocca
è tutta rossa.
Nun è 'o culòre mìo
è sànghe,
ca scòrre ncuòllo a mmé
pé ‘e vic’ e pé ‘e quartiér’.
Me vònne àccidere,
ma je nun mòro pé mò, m’èta crérere.
Fèto da ‘a capa a ‘e pède,
da Marechiaro a Portici,
d ‘o Palazzo Rìale nzìn’ a Casavatore.
‘A bbòna gènte fujie e s’àttappa ‘o nàso
pé nun sciatà tutto chisto fètore ca dinto ‘e
ccase trase.
I Capintesta parlàno arréto, allucàno,
‘a coppa a ‘o munnezzaro e, futtènno
chi chiàgne, càmpanno p’o denaro.
E je chiàgne làcreme amare,
nun m’abbastàno cchiù ‘o sole,
‘a pizza, ‘e sciùre, ‘o mare,
‘na canzuncèlla, tammòrre e mandùline
dìnto a nu ristorante o abbascìo alla marina!
Je voglio ‘a vesticciòlla mèa, linda e pulita;
voglio ancora ‘i capille nire comme a ‘na vòta,
d’ ‘o culòre ‘e ‘sta terra scùra e appasiùnata;
voglio pé i figlie mèjie tutto ‘o rrispetto,
senza ‘sta puzza “ ‘e piècure arreccùte”
ca m’hanno vènnuta ‘a ppoco
e m’hanno pugnalato.
Je nun mòro pé mò, nun mòro accisa,
chesta pé lloro sarrìa – v’ho giuro ! –
proprio ‘na bella ‘mpresa!
Cchiuttòsto addemànno n’aiuto a lu Vesuvio
ca faccésse ‘na bella pulizzìa, comme a ‘nu diluvio,
‘e chesta “èvera fràceca e fetènte”,
sarvànno - s’isso vo’- ‘a ggente mèa
ca pava ghiùrno pé ghiùrno, fatica comme po’,
e nun sàpe cchiù niente.
Luciana Stancapiano
|
