|
Càreno ‘e ggocce
cu’ nu mutivo allère
e zumpariéllo
Sciùliano ‘ngoppe
‘e vitre ‘nfusulilli,
paréno tanta nutarelle
e ‘o mare canta
appriesso a esse,
se struscia e s’allecrèa
Se vève tanta grazia e’ DDio,
tòmo tòmo,
pecché so’ doce e nun fa’
appecundrìa
‘O viento s’accumpagna pure iss
appriesso a esse,
sisca liggiéro comme a trumbettella
Abballa l’acquarèlla,
‘nzembra cu’ mico,
Cu’ ‘e vitre a tammurriello,
sotto na rènza e’ sole,
ca trase e ghièsce comme a tarantella...
Luciana Stancapiano
|
